Hirugarren Culinary Action! On the Road ekimenaren izen-ematea ireki du Culinary Action!-ek, foodtech startupentzako nazioarteko ekintzailetza-programa bat da, eta 2022ko irailean abiaraziko da; New York (AEB), Buenos Aires (Argentina), Kopenhage (Danimarka), Tokio (Japonia) eta Tel Aviv (Israel) hirietan egingo diren lehiaketen bidez gauzatuko da, tokiko partnerrekin lankidetzan, hala nola,  Future Food Institute, Tokyo Food Institute, Danish Startup Group, Dansk Erhverv, Parque de Innovación, Company Ventures, Green Circle Capital Advisors, Cornell University, Cardumen Capital eta The Kitchen FoodTech Hub. 

 

Nazioarteko lehiaketa ibiltari honen hirugarren edizioa da, Culinary Action!-ek abiarazia —Basque Culinary Centerren eta Hazi Fundazioaren ekintzailetza gastronomikoko programa—, eta The Food Global Ecosystem proiektuan kokatua. Proiektu hori publikoa eta pribatua da, Eusko Jaurlaritzak bultzatzen du, eta 60 enpresak baino gehiagok osatzen dute; Euskadik berrikuntza-proiektuak, talentu ekintzailea eta startupak erakarri nahi ditu nekazaritzako elikagaien esparruaren alderdi teknologikoetan.

 

2023an, 360º gastronomiaren eta elikagaigintzaren teknologian diharduten startupak bilatuko ditu CA! On the Roadek. Gastronomiako balio-kateko eragileen eraldatzea (chefak, aretoa, gerenteak, ekoizleak, banatzaileak, jankideak, etab.) bultzatzen duten produktu- edo zerbitzu-proposamenak planteatzen dituzten startupei zuzenduko zaie ekimena. 

Parte hartu nahi duten startupek Culinary Action!-en webgunearen bidez (https://culinaryaction.com/ontheroad/) aurkeztu dezakete lehiaketarako hautagaitza. Izena emateko epea amaitu ondoren, ekitaldiak baino hilabete lehenago gutxi gorabehera, aurkeztu diren startupak aztertuko dituzte Basque Culinary Centerreko arduradunek eta tokiko partnerrek, eta bost finalista hautatuko dituzte tokiko lehiaketak egingo diren hiri bakoitzeko. Txapelketan parte hartu ahal izateko, startupek hasierako fasean egon beharko dute, early stage edo “hazi” egoeran.

Lehiaketaren bigarrengo edizioko irabazlea Reborn Farms, New Yorkeko startupa, arraza- edo klima-ekitateagatik desabantaila ekonomikoak izan dituzten elikadura-sistema hiperlokalak eraikitzea xede duena, izan zen. Finalean Origino (Buenos Aires), Mimic Seafood (Copenhage), O’Taste (Tel Aviv) eta Greenase (Tokio) lehiatu ziren.

Danimarkako Dryk startupak irabazi zuen Culinary Action! On The Road-eko lehengo edizioa. Landare-proteinatik abiatuta edari esnedunak eta begano nutritiboak garatzen egindako lanean osasunarekin eta jasangarritasunarekin izandako konpromisoagatik izan zen hautatua. Donostiako finalean izan ziren, halaber, MOA foodtech (Madril), Bordery (Biarritz) eta ANINA Culinary Art  (Tel Aviv). 

Tokiko lehiaketen egunetan, bost startup finalistek beren proiektua aurkeztuko dute aditu-taldearen eta beste pertsona batzuen aurrean (hala nola inbertitzaileak, mentoreak eta tokiko eragileak) eta ‘elevator pitch’ formatuan; horrekin batera, mahai-inguruak eta tokiko partnerren keynote speakerrak izango dira. Gero, aditu-taldeak startup irabazle bat hautatuko du toki bakoitzeko. 

Tokiko ekitaldi bakoitzeko startup irabazleen saria hau izango da: Donostiako LABe-Digital Gastronomy Lab startup-inkubagailuan hilabeteko egonaldi bat, Basque Culinary Centerrek kudeatutako berrikuntzako living lab ireki bat eta BCC Innovation gastronomiako zentro teknologikoan 20 orduz ikerketa- eta berrikuntza-proiektuak egiteko aukera. Horrez gainera, startupek aukera izango dute denbora-tarte horretan GOe Community plataforma digitalean plan aurreratu bat burutzeko, non Basque Culinary Centerreko aditu eta mentoreen sarearekin bat egiteko eta hartan sartzeko modua izango baitute, eta hainbat motatako laguntza jasoko baitituzte zenbait gairen inguruan (zentroko inbertitzaileen sarerako sarbidea, networka, tokiko ekosisteman sartzeko laguntza.).

Tokiko bost finalistak final handian lehiatuko dira —2024aren hasieran egingo da, Donostian—. Final horretan herrialde bakoitzeko startup irabazleak arituko dira lehian, eta hirugarren CA! On The Road lehiaketako startup irabazlea hautatuko da. Startup horrek LABe-Digital Gastronomy Lab-en sei hilabeteko egonaldia, eta BCC Innovation zentro teknologikoan 25 orduz ikerketa- eta berrikuntza-proiektuak egiteko aukera gehigarria izango du.