Future Gastronomy Startup Forum, Basque Culinary Centerrek antolatua, zazpigarren edizioan, HIP – Horeca Professional Expo 2025 ekitaldian izango da. Berrikuntzari eta joera berriei buruzko Horeca ekitaldirik handiena da hori, eta Madrilgo IFEMAn egingo da, 2025eko martxoaren 10etik 12ra. 

Topaketa bilgune bat izango da startup disruptiboenentzat, berrikuntza-komunitate bat sortzeko, non balio-proposamen aurreratuenak aurkeztuko baitira audientzia global eta espezializatu baten aurrean. Sektoreko enpresa liderrek, inbertitzaileek eta bazkide estrategiko potentzialek aukera izango dute industria irauli nahi duten ideia eraldatzaileak aurkitzeko. Foro hori indarra hartzen ari da talentu ekintzailea ostalaritzako enpresa-ehunarekin konektatzeko espazio berezi gisa, lankidetza sustatuz eta berrikuntza balio-katearen maila guztietara eramanez.

Future Gastronomy Startup Forumen parte hartuko duten proiektuek helburu bat partekatzen dute: teknologia berritzaileak erabiliz, eragin positiboa sortzea gastronomiaren balio-kateko edozein puntutan. Elikagai, osagai eta prozesu berrien garapenetik hasita (adibidez, proteina alternatiboak eta elikagai pertsonalizatuak), jasangarritasuneko eta ekonomia zirkularreko soluzioetaraino (material iraunkorrak, ontzi adimendunak eta elikagai-hondakinak murrizteko estrategiak barne). Beste arlo batzuk ere jorratzen dituzte, hala nola sukaldaritzako eta zentzumenezko zientzia, makineria berritzailea, errealitate birtuala eta areagotua, elikadura eta osasuna, elikagaiekin aplikatutako Adimen Artifiziala (AA)  eta Gauzen Interneta (IoT). Gainera, proiektuen helburua da bezeroaren esperientzia eraldatzea gastronomia pertsonalizatuaren bidez, logistika eta banaketa hobetzea gardentasun eta trazabilitate handiagoarekin, eta jatetxe adimendunen jarduna optimizatzea kudeaketa aurreratuarekin, energia-eraginkortasunarekin eta digitalizazioarekin. Hori guztia, gastronomiaren etorkizuna modu jasangarri, berritzaile eta pertsonengan zentratu batean berrirudikatzeko helburuarekin.

Beren proposamena, soluzioa edo produktua erakutsi nahi duten startup-ek 2025eko otsailaren 14a baino lehen bete dezakete beren hautagaitza, izena emateko formularioa betez. Aukeratutako proiektuek parte hartuko dute Future Gastronomy Startup Forumen, martxoaren 11n, HIP 2025en.

Aurreko edizioetako startup irabazleak

Oreka Circular Economy izan zen Future Gastronomy Startup Forumen 2024ko edizioko startup irabazlea. Elikagai-xahuketa gutxitzen laguntzen du, neurketa-prozesu teknologiko bat integratuta, zeinak errazten baitu murrizteko erabakiak hartzea eta lehentasuna ematen baitio soberakinak errebalorizatzeari, gizarte-erakundeei dohaintzak eginez.

Aurreko edizioetan, aintzatespena egin zitzaien honako hauei: Orquest, langileen txandak eta plantillak modu adimentsuan kudeatzeko startup-a; Cloud Reputation, ospea kudeatzeko eta monitorizatzeko adimen artifiziala aplikatzen duen startup-a; Janby Digital Kitchen konpainia, zeinak QR eskaneatzearen bidez sous-vide egosketa-prozesua digitalizatzeko soluzio bat eskaintzen baitu; Proppos, zeinak elikagaien ezagutzan espezializatutako ikusmen artifiziala erabiltzen baitu, adimen artifizialaren bidez, kutxako ordainketak automatizatzeko; eta CloudTown, sukaldeetan delivery-an espezializatutako marka birtualak gehituz jatetxeen fakturazioak handitzen dituen plataforma digitala.