EDA Beer Summitek nazioarteko lehen mailako garagardogintzako maisu eta adituak bildu ditu gaurko topaketa berezian, zeinera 180 pertsona baino gehiago bertaratu baitira. Sektorearen egungo unea eta etorkizuna aztertzea izan da EDA Drinks & Wine Campusek antolatutako ekitaldiaren helburua.

EDA Beer Summitek Espainiako Garagardogileen eta Basque Beer erakundearen laguntza du, bai eta Eusko Jaurlaritzako Elikadura, Landa Garapen, Nekazaritza eta Arrantza Sailaren eta Arabako Foru Aldundiaren laguntza ere. EDA Drinks & Wine Campusek Gasteizeko eta Guardiako egoitzak ireki aurretik aurreikusi duen jarduera-programaren barruan dago hausnarketa-foroa. 

Susan Wheeler landareen munduko zientzialari eta Hop Revolution-en sortzaileak lupuluen hazkuntzarako baldintza idealak, ezaugarri organoleptikoen garapenean klimaren eragina eta garagardotegiekin elkarlanean egindako lanaren garrantzia nabarmendu ditu izenburu hau duen ponentzian: “Zeelanda Berriko terroira eta lupuluan eta garagardoan duen eragina”. 

Alkoholik gabeko garagardoen merkatuan eskari handia dago, eta horri erantzuteko, Marco Pruner hartziduretan eta garagardo-berrikuntzan adituaren arabera, funtsezkoa da merkatu hori hobeto ulertzen lagunduko duen analisi sentsoriala garatzea eta egitea. “Hartzidura-teknologia berritzaileak alkohol gutxiko eta alkoholik gabeko garagardoa ekoizteko” izenburupean, Prunerrek hartzidura- eta pasteurizazio-prozesuetan funtsezko kalitate-tresna gisa jarduten duten berrikuntza batzuk ere zehaztu ditu, premium garagardo bat lortzeko helburuarekin.

Francois Chartier aromen ikerketan adituak garagardo-aromen gurpilaren gakoak azaldu ditu. Tresna berritzailea eta parerik gabea da, garagardozaleei eta profesionalei garagardo estilo bakoitzean dauden aromak hobeto identifikatzen eta ulertzen laguntzeko diseinatua. "Sommeliertza molekularrean" oinarritutako ikuspegiaren parte gisa sortu zuen gurpil hori harmonia aromatiko eta molekularretan adituak; hala, printzipio zientifikoak aplikatu zituen aromak eta konbinazioak identifikatzeko. “Garagardoaren disekzioa maila molekularrean Chartier World LABen eskutik” izenburupean egin duen hitzaldian, garagardoaren DNA gastronomikoari buruz hitz egin du, profesionalei garagardoaren eta gastronomiaren arteko uztarketa hobeto ulertzen laguntzeko eta egungo sukaldaritza joeretara egokitutako garagardo berriak sortzeko helburuarekin.

Ondoren, jardunaldiko lehenengo mahai-ingurua egin da, "Berrikuntza eta garagardoa gastronomian" izenburupean. Honako hauek hartu dute parte: Karen Peiró Damm taldeko garagardotegiko buruak; Francisco Javier Ruiz Gallego Heineken Españako garagardogintza-maisuak; Antonio Fumanal Ágora taldeko garagardogintza-maisuak; Javier Aldea Mahou San Migueleko BrewHub Managerra; Carlos Ávila Cultura Cervecera Hijos de Riverakoak. Moderatzailea Eduardo Olmedo izan da, Espainiako Garagardogileen Elkarteko Zuzendaritzako ondokoa. Gai hauek nabarmendu dira: Mediterraneoko kontsumo-ereduak, munduko gainerako herrialdeetatik bereizten gaituztenak, garagardoaren banakako kontsumoa, errezetak hobetzen jarraitzeko erronka teknologikoak eta berrikuntza-erronkak, dauzkagun garagardo-barietate handia; eta alkoholik gabeko garagardoaren gorakada, GABEKO garagardoaren kontsumo handiena duen munduko herrialdea garela nabarmenduz.

Oscar Senz Basqueland Brewingekoa, Aran Leon La Pirata Brewingekoa, Igor Berrios Meta Edabeakekoa eta Eneko Neira Laugar Brewerykoak hainbat gai jorratu dituzte, hala nola berrikuntzaren eta esperimentazioaren ahalmena, craft garagardoaren kontsumoa Espainian beste herrialde batzuekin alderatuta, publiko objektiboetara iristeko zailtasunak eta kontsumo-ohituren aldaketak. Jabi Ortega Basque Beer elkarteko gerenteak moldatu du mahaia, "Erronkak eta aukerak craft garagardoan" izenburupean.

Elisa Ucar EDA Drinks & Wine Campuseko zuzendariak eta Jacobo Olalla Espainiako Garagardogileen Elkarteko zuzendari nagusiak itxi dute jardunaldia, partekatutako gai nagusiak nabarmenduz. Alde batetik, garagardoaren eta gastronomiaren arteko harremana nabarmendu da. Hain zuzen, Mediterraneoko kulturan oso errotuta dago eta Espainiako biztanleen % 78k bere identitate gastronomikoaren funtsezko osagaitzat jotzen du. Lotura hori bereziki nabarmena da aperitiboko eta pintxoak jateko une sozialetan, zeinetan garagardoa batez ere zaporeagatik kontsumitzen baita, janariari lagunduz, adiskideekin eta familiarekin batera. Europako beste herrialde batzuetan ez bezala, Espainian garagardoaren kontsumoak lotura estua du elikadurarekin; izan ere, kasuen % 90ean, zerbait jan ohi da hura edatearekin batera.

Bestalde, Espainiako garagardo-sektoreko berrikuntzen bultzadaz, nabarmen dibertsifikatu da garagardoen eskaintza, eta horrek zabaldu egin ditu herrialdearen gastronomia askotarikoarekin uztartzeko aukerak. Garapen hori ez dagokio garagarra eta lupulua tratatzeari eta ekoizteari bakarrik: teknika eta osagai-barietate berriak aztertzea ere barne hartzen du. Horri esker, tokiko gustuetara egokitzen den garagardo-estilo sorta zabala eskaintzeko aukera dago. Hala, tradizioaren eta berrikuntzaren konbinazioak indartu egin du garagardoaren eta Espainiako sukaldaritzaren arteko harremana.

Azkenik, Espainia erreferente bihurtu da, munduan, alkoholik gabeko garagardoaren kontsumoan eta ekoizpenean: 2023an, guztizko kontsumoaren % 14 hartu zuen. Espainiako merkatua segmentu horretako liderra da ezbairik gabe, eta bertako kontsumo-ereduak eraldatu dira: kontsumitzaileen % 74k, uneren batean, alkoholik gabeko bertsioa aukeratu dute. Alkoholik gabeko garagardo-kontsumitzaileen % 90 inguru ohiko garagardo-kontsumitzaile izanak dira; horrek agerian uzten du garagardo-kulturan izan duten onarpena eta zeinen ongi txertatu den. Gainera, alkoholik gabeko garagardoak garrantzi handiagoa hartu du zenbait testuingurutan, hala nola bide-segurtasunarenean, non kontsumoaren % 50 gidatzeari lotua baitago, eta horrek arduraz gozatzea sustatzen baitu.

Garagardoak eta pintxoak bateratzen dituen dastatze batek amaiera eman dio EDA Beer Summiti, eta hainbat proposamen dastatu ahal izan dira bertan, hala nola: Mahouen La Salve Munich, Heineken-en Águila Sin Filtrar 0.0, Ambar-en Ámbar Montañesa, Hijos de Riveraren Lupia Herbal Nugget, Basquelanden Gilda eta Voll Damm.

Honako hauek inauguratu dute jardunaldia: Joxe Mari Aizega Basque Culinary Centerreko zuzendari nagusiak, Amaia Barredo Eusko Jaurlaritzako Elikadura, Landa Garapen, Nekazaritza eta Arrantza sailburuak eta Noemí Aguirre Arabako Foru Aldundiko Nekazaritzako foru-diputatuak.

“Jardunaldi hau gauzak nola egin nahi ditugun erakusteko adibide bat da. Sektoreko profesionalei entzun nahi diegu eta EDA Drinks & Wine Campus eraiki, proposamen moderno eta garaikide moduan, eta, batez ere, komunitate baten proposamen bateratu gisa”— esan du Joxe Mari Aizega Basque Culinary Centerreko zuzendari nagusiak.

“Urte hauetan, gure herrian, hemen Euskadin, garagardoaren sektoreak bilakaera positiboa izan du egunetik egunera, beti gizartearen ohituren eta merkatuen kanpainen gorabeherekin”, azpimarratu du Amaia Barredok, Eusko Jaurlaritzako Elikadura, Landa Garapen, Nekazaritza eta Arrantza sailburuak.