Peruko sukaldaritzaren ikono da Acurio, eta Astrid & Gastón jatetxe ospetsuaren jabea. Sutsuki sinesten du sukaldaritzak aldaketa sozialerako tresna gisa duen indarrean. Aitortza handia jaso du bere herrialdea munduan ezagutzera emateko eta cebiche-a baino askoz gehiago eskaintzen duen sukaldaritza zabaltzeko egindako ahaleginagatik. Acuriok sustatutako proiektuetako bat Pachacútec da, zeinaren bidez ehunka gazte sukaldaritzan trebatzen baitira Limako aldirietan, eta kulturarekin, gai sozialekin eta ingurumenarekin lotutako helburuak dituzten proiektuak ere bultzatzen ditu. Halaber, Acuriok bultzatutako proiektuak dira, besteak beste, Madam Tusan, La Mar, Los Bachiche (sukaldaritza italo-perutarra), Papachos (hanburgesategia), Melate Chocolate (Peruko kakaoa goraipatzen duen txokolategia) eta Yakumanka. Hainbat liburu ere argitaratu ditu; horien artean, “Perú: Gastronomía”, Peruko sukaldaritza tradizionaleko 500 errezeta biltzen dituena, “Cebiche Power” eta “Recontra ¡Bravazo!”.

Manu Buffara Latinoamerikako etorkizun handiko chefetako bat da. Manu jatetxetik (Curitiba, Paraná), bere kulturaren eta nortasunaren erakusgarri diren jakiak partekatzen ditu. Buffarak sukaldaritzarekiko duen grinak sustrai sakonak ditu bere haurtzaroan. Nekazarien alaba izanik, lurra eta lurreko produktuak baloratzen ikasi zuen, eta ezagutza hori aprobetxatu zuen bere sukaldaritzari forma emateko. Horrez gain, konpromiso handia agertu du helburu sozialeko proiektuetan. Manu Buffarak Latinoamerikako Sukaldari Emakume Onenaren aitortza jaso zuen 2022an. 2023an, berriz, “Manu: Recetas e Historias de mi Brasil” argitaratu du. Indigenen eta baztertutako komunitateen osagaietan oinarrituta, sukaldaritzan egin duen ibilbidea azaltzen du liburu horretan.

Hiru Michelin izarreko Atelier Crenn jatetxea gobernatzen du Crennek, eta ospetsu egin da oroitzapenak plater modernista eta irudimentsu bihurtzeko duen trebeziagatik. Bere sukaldaritzaren bikaintasunaz haratago, The Word´s 50 Best Restaurants zerrendako Icon saria jaso zuen 2021ean, bere ibilbide esanguratsuaren aitortza gisa. Mundu osoan da ezagun Crennen lana, sukaldaritzari buruzko heziketan eta sustapenean. Besteak beste, Harvard-eko Unibertsitatean eta antzeko erakundeetan eman izan ditu hitzaldiak, eta mundu osoko ekitaldi gastronomikoetan hartzen du parte. Gaur egun, modernitatea, goi-mailako artisautza eta garaiko produktuak biltzen dituen sukaldaritza sortzea du xede. Duela gutxi, 2023ko uztailean, Golden Poppy izeneko jatetxe berria ireki zuen Parisen. Kaliforniako askatasunaren, berdintasunaren eta kultur aniztasunaren balioak inspirazio-iturri dituen jatetxea da, kultura anitzeko proposamena egiten duena, jasangarritasuna eta tokiko produktuak goratuz. Crennek sukaldaritzarekiko duen pasioa eta sormena nabariak dira Golden Poppy goxo eta argitsuan. Mundu osotik etorritako jendeak aukera du, plater bakoitzean, Crennen maitasunaren adierazpen artistikoarekin gozatzeko.

Filosofia transgresoreko sukaldari grinatsua da Bottura. Beretzat, kultura da chef batek besteetatik bereizteko erabili behar duen benetako boterea. Modenako hiru Michelin izardun Osteria Francescana jatetxean, musikako eta arte garaikideko elementuekin egiten du jolas, edertasuna eta plazera bilatzeko, eta, aldi berean, bere iritzia zabaltzeko. Botturak zalantzan jartzen du tradizio italiarra, nostalgiarik gabeko ikuspegi kritiko batetik. Eskualdeko garaiko elikagai bikainak erabiliz, plater irudimentsu bezain berritzaileak sortu ditu Botturak; besteak beste, “Ene! Limoizko pastela hautsi dut” eta “Kutsadura”, kutsadura nuklearraren aurkakoa. 2015eko Milango Expo-an, Refettorio Ambrosiano jangela ezarri zuen, behartsuei azokako janari-hondakinekin egindako bazkariak emateko eta, hala, elikagai-soberakinak murriztearen garrantziaz ohartarazteko. Gai sozialen eta ingurumenaren aldeko ekimenekin lotutako hainbat kanpainaren bultzatzaile ere izan da. Besteak beste, irabazi asmorik gabeko Food For Soul erakundea sortu zuen, elikagai-soberakinei eta goseari buruzko kontzientzia soziala sustatzeko helburuarekin. Gaur egun 11 herrialdetan diharduen erakundea da.

Mexikoko chef laudatuenetakoa da Olvera. Mexiko Hiriko Pujol jatetxearen jabea da, eta ezagun egin zen mundu osoan Mexikoko tradizio gastronomikoa eraldatu, eta ikuspegi garaikide, sentikor eta benetakoa eskaintzeagatik. Gaur egun, hamabost jatetxe ditu (horien artean, New Yorkeko Cosme jatetxea); tokiko produktuaren alde egiten du denetan. Gauza xumeen aldekoa da Olvera, eta muzin egiten die proposamen handinahi eta gainkargatuei. Kultura eta ekologia dira bere proposamenaren ezaugarriak: abangoardiako metodoak metodo prehispanikoekin osatzen ditu, ia galduta dauden espezie natiboak erabiliz, eta kalitate goreneko produktu jasangarriekiko konpromisoa adierazten du. Halaber, artoaren laborantza masiboaren aurkako ekimenak bultzatu izan ditu, baita Mexiko Hiriko haurren dieta hobetzeko heziketa-programak ere, obesitate-maila kezkagarriak kontuan izanda. Duela gutxi, Estatu Batuetako toki gehiagotara zabaldu duen jatetxe-sarea; adibidez, Atla Venice, Kalifornian.

Hahnemanns Køkken jatetxeko jabe izan zen chef daniar hau, eta gaur egun, elikagai organiko eta jasangarrietan oinarritutako eguneroko sukaldaritza egingarri eta osasungarriaren ontasunei buruzko liburuen idazle eta dibulgatzailea da. Hainbat hamarkada eman ditu emakumeek gastronomian egindako lana defendatzen, eta erreferentea da taldeen lidergo eta kudeaketaren arloan. Hahnemannek 10 liburu idatzi ditu bere hizkuntzan −danieraz− eta 7 ingelesez; horien artean, "Copenhagen Food" (2018), "The Nordic Diet" (2009) eta "The Scandinavian Cookbook" (2008). 2023an, "Simply Scandinavian" argitaratuko du, errezeta-bilduma iradokitzaile bat jasotzen duen liburua. Estatu Batuetako eta Britainia Handiko aldizkari eta egunkarietan idazten du (besteak beste, The Guardian eta Time Magazine), eta askotan parte hartzen du BBCren sukaldaritza-saioetan.

Tokion (Japonia) dagoen bi Michelin izardun Narisawa jatetxeko chefa eta jabea da Yoshihiro Narisawa. Asiako 50 Jatetxe Onenen zerrendan ere egon izan da Narisawaren jatetxea. Sukaldaritza ikasteko Europan zehar bidaia luze bat egin ondoren, 1996an itzuli zen Japoniara, eta han ireki zuen lehenengo jatetxea. Frantziar sukaldaritza-teknika klasikoak Japoniako osagaien erabilera poetikoarekin konbinatuz, Narisawak segituan lortu zuen kritikaren aho bateko onespena. Sukaldari japoniarra ezaguna da sasoiko osagai organikoekiko agertzen duen errespetuagatik, eta hainbat sari jaso ditu jasangarritasunaren eta kontserbazioaren aldeko konpromisoagatik. Narisawak Japoniako osagaiekin esperimentatzen du (zuhaitzen izerdia, itsasoko sugea, basoko belar eta loreak) sukaldaritza-teknika berritzaileak erabiliz (adibidez, ongarri gisa erabilitako barazkien karbonizazioa). Modu horretan, “urtaroaren liluran” murgiltzen zaituen haiku baten antzeko esperientzia gastronomikoa sortzen du. 2018an, Bees Bar by Narisawa ireki zuen, Narisawaren Satoyama sukaldaritza definitzen duten osagaietan oinarritua. 2021ean, berriz, "Satoyama Cuisine" argitaratu zuen; Narisawaren sukaldaritza sakon aztertzen duen liburua.

Colagrecok (La Plata, 1976) Buenos Airesen hazi eta ikasi zuen, baina Frantzian egin du bere sukaldaritza-ibilbidea. Hain zuzen, 2001ean iritsi zen Frantziara, eta Bernard Loiseau-rekin ikasteko aukera izan zuen, chef ospetsua 2003an hil zen arte. Ondoren, beste sukaldari frantziar ezagun batzuen alboan ikasten jarraitu zuen (horien artean, Alain Passard, Alain Ducasse eta Guy Martin). 2006an, Menton-era joan zen, Italiako mugatik gertu dagoen Cote d´Azur-eko herri eder eta turistikora. Han, Mirazur jatetxea hartu zuen, eta urte bete baino gutxiagoan lortu zuen lehenengo Michelin izarra. Kostaldeko nahiz mendiko produktuen gertutasunari eta Colagrecoren talentuari eta sormenari esker, The World´s 50 Best Restaurants zerrendako lehenengo lau postuetan egon da 2016az geroztik. Sari horiek guztiak jasotzeaz gain, Carne jatetxean ari da lanean gaur egun Colagreco, osagai organikoekin eta goi-mailako haragiekin lan egiten duen hanburgesategian.

Elena Reygadas Mexikoko gastronomiako irudi garrantzitsuenetako bat da. Jatetxe eta okindegi ezagun batzuen talde bateko chefa eta jabea da: Rosetta, la Panadería de Rosetta, Lardo eta Café Nin. Elena Reygadas sukaldaria Mexikoko tokiko produktuaren eta elikadura osasungarriarekin eta jasangarriarekin lotura duten gizarte-kausen defentsarekin konprometituta dago. 2019an, bere lehen liburua argitaratu zuen, ‘Rosetta’, Sexto Piso argitaletxeak argitaratua. Sari ugari jaso ditu, hala nola Latin America’s Best Female Chef (2014).

Sidneyko Josh Niland chef australiarrak eraldatu egin du arraina prestatu, garraiatu, ondu eta biltegiratzeko modua. Hala, mundu osoan egin da ospetsu arrainak osorik, batere soberakinik sortu gabe, prestatzeko duen ikuspegi etiko, jasangarri eta iraultzailea. Hainbat sukaldaritza-sari jaso ditu Nilandek; horien artean, James Beard saria. Gaur egun, lau jatetxeren jabe da: Saint Peter, Charcoal Fish, Fish Butchery Paddington, eta berriki ireki duten Fish Butchery Waterloo. Eta, horrez gain, hiru liburu argitaratu ditu: "The Whole Fish Cookbook", "Take One Fish" eta berriena, “Fish Butchery: Mastering the Catch, Cut and Craft”.

Narda Lepes chefa, komunikatzailea eta ekintzailea da, eta, horrez gain, hainbat libururen egilea: "Comer y Pasarla Bien", "Ñam ñam: Manual para alimentar a un pequeño omnívoro” eta “201 Tips para no comer como el or**". 2017an, Narda Comedor jatetxea ireki zuen, eta 2020an, Latinoamerikako 50 Jatetxe Onenen zerrendan sartu zen. Bestalde, Lepesek paper garrantzitsua izan du, besteak beste, A.C.E.L.G.A., M.I.G.A. eta Masticar azokaren gisako elkarte eta proiektuetan. Ekimen horien bidez, landareetan gehiago oinarritutako elikadura-ohiturak hartzea bultzatzen du. Halaber, nekazarien salmenta zuzenerako gaitasuna handitzea helburu duen Unión de Trabajadores de la Tierra (UTT) erakundearekin aritzen da lanean. 2020ko azaroan, Latinoamerikako Emakume Sukaldari Onenaren sari prestigiotsua jaso zuen, Munduko 50 Jatetxe Onenak zerrendaren eskutik. Bestalde, “Comé + Plantas” izeneko app berria ere sortu du. App horren bidez, eskuetan duen barazkia edo fruta identifika dezake erabiltzaileak, eta gaur egungo mugikorrek −kameraren bidez− objektuak aztertu eta ezagutzeko duten gaitasuna erabiliz, barazki edo fruta horren ezaugarriak, kontsumitzeko modurik egokiena eta edozein barazki edo fruta jateko edo prestatzeko aholkuak ematen ditu zuzenean.

Pia León gazteak Peruko gastronomia garaikidearen proposamen pertsonal eta sortzaileenetako bat egiten digu, eta Peruren gisako herrialde baten kultur aniztasun ikaragarria ezagutzera gonbidatzen gaitu. León-ek Central jatetxeetako jabekide gisa egin zituen lehenengo pausoak. Hiru urtez jarraian, Latinoamerikako 50 jatetxe onenen zerrendan lehenengoa izan zen Central, eta Munduko 50 Jatetxeko Onenen zerrendako lehenengo hamarren artean egon zen. Ondoren, bere bideari ekin zion, Kjolle jatetxearekin. Ireki bezain laster, Latinoamerikako 50 Jatetxe Onenen zerrendan 21.a izan zen 2019an, eta Sarrera Berri Onenaren saria irabazi zuen. Horrez gain, Latinoamerikako Emakume Sukaldari Onenaren saria jaso zuen Leónek 2018an eta 2021ean, eta Urteko Sukaldari Berri Onenarena 2019an. Sari horiek toki esanguratsua eman diote sukaldaritzaren munduan.

Etxeko janari goxoz inguratuta hazi ondoren, Thitiden amaren eta amonaren zaporeek lagundu dute, neurri handi batean, sukaldaritzarekiko bere pasioan. Chulalongkorn Unibertsitatean Ekonomiako lizentziatura amaitu zuenean, Estatu Batuetara abiatu zen bere ametsa Culinary Institute of America (CIA) ospetsuan jarraitzeko. Puntuazio altuena lortu zuen graduatuak eta MBA bat jasotzen jarraitu zuen Johnson Wales Unibertsitateko Abegi Etxean. New Yorken, Thitidek Michelin izarrak dituzten hainbat jatetxetan lan egin du, besteak beste, Eleven Madison Park, The Modern eta Jean Georges jatetxeetan. Janariarekiko duen grina ikaragarria izateaz gain, ardoarekiko zuen berotasunak Sommelier Ziurtatua (CS) izatera eraman zuen, Sommelier Maisuen Gorte errespetatuaren eskutik. Thailandiako sukaldaritza goratzeko eta munduko sukalde nagusien artean leku bat emateko esperientziak eta ikuspegia ekarri ditu etxera. Orain, chef gaztea Bangkokeko sukalderik ospetsuetako bat zuzentzen ari da, Le Du (Michelin izar bat eta #1 Asia's 50 Best Restaurants 2023) eta Nusara (#3 Asia's 50 Best Restaurants 2021).